Evrópumeistarar Bayern München vonast til að landa þremur nýjum leikmönnum áður en félagaskiptaglugginn lokar í byrjun næstu viku.
Einn þessara leikmanna er spænski miðjumaðurinn Marc Roca. Hann er á leið til Bayern frá Espanyol fyrir 15 milljónir evra. Hann mun skrifa undir samning til 2024.
Roca er 23 ára gamall og hefur hann verið á mála á Espanyol frá því hann var 11 ára.
Þýski blaðamaðurinn Christian Falk skrifar á Twitter: „Marc Roca er fyrstur af þremur leikmönnum sem Bayern vill krækja í fyrir mánudag."
Annar leikmaður sem vitað er um að sé á óskalista þýska stórveldisins er Callum Hudson-Odoi, 19 ára gamall kantmaður Chelsea.
Bayern reyndi mikið að fá Hudson-Odoi á síðasta ári en þá skrifaði hann undir nýjan samning við Chelsea. Núna er Bayern að gera aðra tilraun. Frank Lampard, stjóri Chelsea, vill halda hinum efnilega Hudson-Odoi en Hansi Flick, þjálfari Bayern, vill ólmur fá hann.
„Hann er einn af hæfileikaríkustu leikmönnunum í sinni stöðu og þess vegna viljum við í Bayern fá hann," segir Flick.
Hudson-Odoi er þessa stundina að spila með Chelsea gegn Crystal Palace í ensku úrvalsdeildinni.
FCB-Manager Hansi Flick confirms the interest of @FCBayern in Callum Hudson-Odoi: „He is one of the greatest talents on the position. therefore it is legitimate that we at Bayern Munich deal with him“ @ChelseaFC
— Christian Falk (@cfbayern) October 3, 2020
Athugasemdir