Stjarnan gerði 1-1 jafntefli við Fylki í eina leik dagsins í Pepsi Max-deild kvenna og var Kristján Guðmundsson svekktur að hafa ekki skorað meira en eitt eftir yfirburði í fyrri hálfleik.
„Ég var mjög ánægður með mætinguna á völlinn, það er gaman að sjá fólk fylgjast með okkur og hvetja áfram," sagði Kristján strax að leikslokum.
„Við hefðum viljað vera búin að skora meira en eitt mark í fyrri hálfleik en í seinni hálfleik var þetta mikill barningur og barátta. Við náðum að verjast löngu boltunum frá þeim en vorum ekki alveg nógu klók í sóknarleiknum."
Kristján var að lokum spurður hvort hann teldi Stjörnuna vera með öruggt sæti í efstu deild eftir jafnteflið, en Garðbæingar eru fimm stigum fyrir ofan fallsvæðið þegar lið eiga ýmist tvær eða þrjár umferðir eftir.
„Það var gott að fá stig og við erum að gera vel. Þetta lið er í hörkustandi og er að spila vel, eins og sást í fyrri hálfleik. Það var barningur í síðari hálfleik og við þurfum að spila svoleiðis leiki líka. Okkur líður bara vel og við höfum trú á þessu. Sjáum bara hvernig umferðin klárast á morgun."
Athugasemdir