Lögreglan í Þýskalandi segir að meira en 30 manns hafi verið handteknir í gærkvöldi eftir slagsmál á milli fótboltabullna frá Frankfurt og London.
Eintracht Frankfurt tekur á móti West Ham United í undanúrslitaleik Evrópudeildarinnar í kvöld og voru margir stuðningsmenn Hamranna mættir til Þýskalands í gær.
Einhverjir þeirra voru mættir til að slást og fundu heimamenn sem vildu slást á móti. Einhverjir saklausir stuðningsmenn lentu illa í því og eru tveir frá London á spítala með höfuðáverka eftir að hafa verið rotaðir.
Lögregla þurfti að brjóta upp tæplega 1000 manna samkomu þar sem stuðningsmenn West Ham höfðu safnast saman á aðallestarstöðinni í Frankfurt am Main. Þar barðist hluti þeirra við stuðningsmenn Frankfurt sem voru ekki lengi að mæta á lestarstöðina.
Á þriðjudagskvöldið bárust fregnir af stuðningsmönnum West Ham sem lentu í árás frá rúmlega 20 manna bulluhópi heimamanna.
Frankfurt vann fyrri leikinn í London, 1-2. Sigurvegari kvöldsins mætir annað hvort Rangers eða RB Leipzig í úrslitaleik.
