Ísland tryggði sér 9. sætið á Algarve-æfingamótinu í kvöld með sigri á Danmörku í vítaspyrnukeppni. Í annað sinn á nokkrum dögum gerðu Ísland og Danmörk jafntefli.

Þessi lið mættust í fyrsta leik sínum á mótinu og þá var niðurstaðan markalaust jafntefli.

Það var leikið við erfiðar aðstæður í kvöld og var völlurinn mjög blautur. Leikurinn var þó spilaður, annað en úrslitaleikurinn.

Ísland fékk góð færi til að skora í fyrri hálfleiknum og átti fyrirliðinn Sara Björk Gunnarsdóttir þ.á.m. skalla í stöngina. Staðan var markalaus þegar liðin gengu til búningsklefa.

Það kom í hlut Dana að skora fyrsta markið og var það Sanne Troelsgaard-Nielsen sem gerði það. Hún er liðsfélagi Glódísar Perlu Viggósdóttur hjá sænska liðinu Rosengård.

Ísland ætlaði ekki að gefa níunda sætið frá sér og jafnaði metin á 70. mínútu. Hlín Eiríksdóttir, stúlka fædd árið 2000 úr herbúðum Vals, skoraði þá sitt fyrsta A-landsliðsmark.

Ekki voru fleiri mörk skoruð eftir þetta og var farið beint í vítaspyrnukeppni.

Þar skoraði Ísland úr öllum fimm spyrnum sínum á meðan Sonný Lára í marki Íslands varði eina danska spyrnu. Sigurinn var því íslenskur á þessu miðvikudagskvöldi.

Ísland endar í níunda sæti mótsins með með einn sigur, tvö jafntefli og eitt tap á bakinu.

Þess má geta að Danmörk er silfurliðið frá síðasta Evrópumóti.

Andrea Rán skorar og Ísland vinnur!

— Knattspyrnusambandið (@footballiceland) March 7, 2018