Borussia Dortmund tók á móti FC Bayern í risaslag og síðasta leik dagsins í þýska boltanum.

Leikurinn var gríðarlega fjörugur þar sem stjörnum prýdd stórliðin skiptust á að sækja endanna á milli. Bæði lið fengu frábær færi og var mark dæmt af Robert Lewandowski vegna rangstöðu. Erling Braut Haaland fór pirraður inn í klefa því hann brenndi af dauðafæri.

Fyrsta mark leiksins leit dagsins ljós skömmu fyrir leikhlé, Marco Reus skoraði þá laglegt mark fyrir Dortmund en David Alaba jafnaði með glæsilegu marki úr aukaspyrnu í uppbótartíma fyrri hálfleiks.

Í upphafi síðari hálfleiks kom Lewandowski gestunum yfir og var mikið fjör næsta hálftímann en inn vidi boltinn ekki fyrr en Leroy Sane, sem hafði komið inn af bekknum tíu mínútum fyrr, skoraði. Lewandowski átti stoðsendinguna og reyndist þetta sigurmarkið því Haaland náði að minnka muninn skömmu síðar.

Haaland lék á Manuel Neuer áður en hann skoraði en fagnaði ekki enda ósáttur með að hafa klúðrað nokkrum dauðafærum í þessum mikilvæga stórleik. Lewandowski kom knettinum aftur í netið í uppbótartíma en markið ekki gilt vegna rangstöðu.

Bayern stóð uppi sem sigurvegari eftir rúmlega sjö mínútna uppbótartíma og endurheimti toppsæti deildarinnar af Leipzig. Dortmund er í þriðja sæti, þremur stigum eftir Bayern.