Arsenal 2 - 1 Brentford
1-0 Declan Rice ('19)
1-1 Yoane Wissa ('45+4)
2-1 Kai Havertz ('86)
1-0 Declan Rice ('19)
1-1 Yoane Wissa ('45+4)
2-1 Kai Havertz ('86)
Arsenal og Brentford áttust við í lokaleik dagsins í ensku úrvalsdeildinni og tóku heimamenn forystuna í fyrri hálfleik, þegar Declan Rice gerði vel að skalla góða fyrirgjöf frá Ben White í netið.
Leikurinn var nokkuð jafn, þar sem Arsenal hélt boltanum betur en gestirnir voru hættulegir í sínum sóknaraðgerðum. Heimamenn í Arsenal voru bitlausir og tókst gestunum að gera jöfnunarmark fyrir leikhlé, sem skrifast alfarið á Aaron Ramsdale, markvörð Arsenal.
Ramsdale var alltof lengi að hreinsa boltann frá marki og endaði á að sparka honum í Yoane Wissa sem kom í pressunni og þaðan endaði boltinn í netinu.
Síðari hálfleikurinn var nokkuð jafn, þar sem Arsenal átti í vandræðum með að opna vörn Brentford og reyndust skyndisóknir gestanna hættulegar. Ramsdale bætti upp fyrir mistökin hryllilegu með frábærum markvörslum í síðari hálfleik og var staðan jöfn allt þar til á lokakaflanum.
Það voru Ben White og Kai Havertz sem gerðu gæfumuninn, þegar Havertz kom boltanum í netið með góðum skalla eftir aðra fyrirgjöf frá White - sem lagði bæði mörk Arsenal upp með fyrirgjöfum frá hægri vængnum.
Arsenal fer á topp ensku úrvalsdeildarinnar með þessum sigri, en getur misst sætið á morgun þegar Liverpool og Manchester City mætast í eftirvæntum toppslag.
Athugasemdir