Neyðarfundur hefur verið kallaður fyrir stjórnendur félaga í Serie A eftir að Sky Italia og DAZN tilkynntu að þau myndu ekki borga út síðustu greiðslu fyrir sjónvarpsréttindi 2019-20 tímabilsins.
Engir leikir hafa verið spilaðir í Serie A síðan í byrjun mars og ekki er búist við að ítalski boltinn geti farið aftur af stað fyrr en í júní í fyrsta lagi.
Ítalskir fjölmiðlar greina frá því að málið gæti endað fyrir dómi. Sky og DAZN vilja viðræður um afslátt og greiðsludreifingu á meðan stjórnendur Serie A virðast harðir á að fá alla upphæðina greidda sem fyrst.
Sky sýnir flesta leiki ítalska boltans. DAZN er með réttinn á þremur leikjum á umferð.
Komist aðilar ekki að samkomulagi geta bæði Sky og DAZN gleymt því að fá sýningarréttinn á Serie A aftur á næstu árum.
Athugasemdir