Liverpool er búið að borga Derby County hálfa milljón punda til að taka endursöluákvæði Kaide Gordon úr kaupsamningnum.
Liverpool greiddi eina milljón punda fyrir táninginn í fyrra. Í kaupsamningnum var 20% endursöluákvæði, sem þýðir að Derby átti rétt á 20% af hagnaði af mögulegri framtíðarsölu Gordon frá Liverpool.
Nú á Derby í miklum fjárhagsörðugleikum og ljóst að hálf milljón punda getur skipt sköpum í ensku C-deildinni. Því samdi félagið við Liverpool um að taka endursöluákvæðið út, ákvæði sem Derby myndi líklega ekki hagnast á fyrr en eftir þónokkur ár.
Gordon byrjaði sinn fyrsta leik fyrir Liverpool aðeins 16 ára gamall - gegn Norwich í deildabikarnum. Hann átti 17 ára afmæli, skrifaði undir atvinnumannasamning og fagnaði með því að skora í sigri gegn Shrewsbury í FA bikarnum í janúar. Hann varð þar með næstyngsti markaskorari í sögu Liverpool.
Gordon þykir gríðarlega efnilegur og gæti kaupverðið sem Liverpool þarf að borga til Derby hækkað um þrjár milljónir í viðbót.