David Datro Fofana skoraði magnað opnunarmark með bylmingsskoti utan vítateigs, áður en Konstantinos Mavropanos varð fyrir því óláni að skora sjálfsmark.

Hamrarnir áttu hörmulegan fyrri hálfleik en tóku stjórn á leiknum í síðari hálfleik og voru snöggir að minnka muninn. Lucas Paquetá skoraði í upphafi seinni hálfleiks en jöfnunarmarkið leit ekki dagsins ljós fyrr en í uppbótartíma, þegar Danny Ings bjargaði stigi.

„Í fyrri hálfleik var eins og strákarnir væru þunnir eftir evrópuleikinn á fimmtudagskvöldið, en þeir hristu þetta af sér í leikhlé og áttu frábæran seinni hálfleik. Við klúðruðum svo alltof mikið af færum undir lokin," sagði Moyes eftir jafnteflið.

„Það var mikið af dómaraákvörðunum sem fóru á móti okkur. Línuvörðurinn flaggaði kolranga rangstöðu í fyrri hálfleik sem drap góða sókn hjá okkur og svo áttum við að fá vítaspyrnu þegar Sander Berge skallaði boltann í höndina á sér. Það féll ekkert með okkur."

Moyes endaði á því að hvetja stuðningsmenn West Ham til dáða. Hann gagnrýndi þá fyrir að vera hljóðlátir í bragðdaufum fyrri hálfleik.

„Við þurfum hjálp frá stuðningsmönnum til að koma okkur almennilega í gang. Við þurfum hvatningu og eldmóða úr stúkunni. Við þurfum að hafa alla stuðningsmennina á bakvið okkur og þeir voru það í seinni hálfleik. Stuðningurinn hjálpaði okkur gríðarlega mikið eftir leikhléð og skipti sköpum að lokum."