Gylfi Þór á æfingu í Rússlandi.
Upphitun landsliðsmanna á æfingu.
„Það kom mér örlítið á óvart hversu rólegir við erum búnir að vera. Ég hélt að það yrði meiri spenna og æsingur í okkur en ég held að það sé bara jákvætt. Ég held að þetta komi þegar við byrjum að ferðast í leikina og erum mættir á völlinn," sagði miðjumaðurinn, Gylfi Þór Sigurðsson í viðtali við Fótbolta.net fyrir æfingu landsliðsins í Gelendzhik í morgun.
Í dag eru fjórir dagar í fyrsta leik Íslands á HM í knattspyrnu frá upphafi. Ísland mætir þá Argentínu í Moskvu.
Í dag eru fjórir dagar í fyrsta leik Íslands á HM í knattspyrnu frá upphafi. Ísland mætir þá Argentínu í Moskvu.
Gylfi Þór segist vera hrifinn af Rússlandi það sem af er.
„Þetta er frábært hótel og góð aðstaða fyrir okkur og frábær æfingasvæði. Það mætti vera aðeins minni vindur fyrir utan það þá hefur þetta verið mjög fínt," sagði Gylfi en eru landsliðsmennirnir nokkuð of yfirvegaðir?
„Ég vona ekki, það kemur allt í ljós. Það var kannski meiri spenna og fiðringur í okkur fyrir EM, þá var allt fyrst hjá okkur. Við erum ekki að upplifa allt í fyrsta skipti núna. Það kannski hjálpar okkur. Við fórum langt á adrenalíninu á síðasta stórmóti."
„Ég held að reynslan af EM sé að hjálpa okkur, sérstaklega í undankeppninni fyrir HM. Reynsla af stórum leikjum og þurfa að spila vel þegar þess þarf. Það er erfitt að segja hversu mikilvæg hún er, en hún er gríðarlega dýrmæt fyrir okkur og ég vona að við getum nýtt hana á þessu móti."
Argentínski varnarmaðurinn og liðsfélagi Gylfa í Everton Funes Mori var ekki valinn í lokahóp Argentínu fyrir HM. Hefur Gylfi eitthvað heyrt í honum og beðið um ráð til að vinna Argentínu?
„Ég ætti kannski að heyra í honum. Við spjölluðum auðvitað mikið saman fyrir sumarfrí. Ég þarf nú ekki að spyrja hann mikið út í leikmenn Argentínu, við vitum það að þeir eru allir mjög góðir og það er erfitt að brjóta þá niður," sagði Gylfi Þór.
Viðtalið í heild sinni má sjá í sjónvarpinu hér að ofan.
Athugasemdir
