Í desember var undirritað samkomulag um að leggja gervigrasvöll á aðalvöll Fylkis. Framkvæmdir eru þó ekki ennþá hafnar.

„Þetta er í útboðsferli og framkvæmdir ættu að geta hafist um næstu mánaðarmót. Það þarf að leggja allar lagnir og allt undir vellinum," sagði Hörður Guðjónsson framkvæmdastjóri Fylkis við Fótbolta.net í dag.

„Upphaflega planið var að ná þessu fyrir mót en ef maður er alveg raunsær þá er það líklega ekki að ganga. Ekki nema menn vinni rosalega hratt."

Fylkir byrjar Pepsi-deildina á útivelli gegn Víkingi R. en liðið á heimaleiki í 2. umferð (6. maí) gegn KA og í 4. umferð (17. maí) gegn ÍBV. Allt bendir til þess að þeir leikir fari fram á Þróttarvelli.

„Við höfum rætt við Þróttarana um að spila fyrstu tvo leikina þar en þetta er ekki alveg orðið 100%," sagði Hörður.

Fylkir stefnir á að leika fyrsta leikinn á nýju gervigrasi á aðalvelli sínum þann 28. maí þegar FH kemur í heimsókn í 6. umferð Pepsi-deildarinnar. „Við erum að horfa á þann leik til að vera alveg raunsæ," sagði Hörður.

Kvennalið Fylkis spilar í 1. deild kvenna og þar er ekki leyfiskerfi eins og í Pepsi-deiild karla. Því spilar kvennaliðið fyrstu heimaleiki sína á núverandi gervigrasvelli Fylkis en þar er engin stúka fyrir áhorfendur.