Pepe gerði sér lítið fyrir og spilaði bæði venjulegan leiktíma og framlengingu þrátt fyrir að vera orðinn 41 árs gamall.

Mikið var rætt og skrifað um frammistöðu Pepe í leiknum, en það er auðvitað afar merkilegt að 41 árs gamall leikmaður sé enn að spila svona vel á háu stigi.

Pepe, sem hefur í gegnum tíðina verið þekktur fyrir að vera grófur leikmaður, er sá fyrsti sem er 40 ára og eldri til að spila í útsláttarkeppni Meistaradeildarinnar. Það afrek og frammistaða hans í gær er eitthvað sem ber að virða.

Það er ekki annað hægt að segja en að þetta sé ótrúlegt afrek hjá þessum frábæra miðverði en til að setja hlutina í samhengi þá spilaði hann sinn fyrsta leik í Meistaradeildinni fyrir 20 árum síðan og er hann á sama aldri og Mikel Arteta, stjóri Arsenal.

Því miður fyrir Pepe, þá er Porto úr leik en hann getur farið úr keppninni með höfuðið hátt.