Unai Emery, nýr stjóri Arsenal, ætlar ekki að gera eins og Arsene Wenger og nota varaliðið sitt í riðlakeppni Evrópudeildarinnar.
Arsenal komst alla leið í undanúrslit í fyrra þar sem Atletico Madrid hafði betur eftir dramatískar rimmur.
Wenger tefldi fram ungu varaliði í riðlakeppninni en Emery, sem vann Evrópudeildina þrisvar í röð með Sevilla, segist taka keppninni alvarlega.
„Núna er mikilvægt að hugsa um leik helgarinnar gegn Newcastle. Við þurfum þrjú stig þar, rétt eins og við þurfum þrjú stig í Evrópudeildinni. Þetta eru jafn mikilvægir leikir," sagði Emery.
„Ég hef sannað það á ferlinum að ég þekki leiðir til að ná því besta úr mönnum og það er mikilvægt að gera ekki of margar breytingar á byrjunarliðinu á milli Evrópu- og deildarleikja."
Rafael Benitez, samlandi Emery, er við stjórnvölinn hjá Newcastle og hafa þeir aðeins mæst einu sinni á ferlinum. Þá hafði Sevilla betur gegn Real Madrid.
„Benitez var fyrsti spænski þjálfarinn til að koma í úrvalsdeildina og býr yfir mikilli reynslu. Hann er mjög góður stjóri og Newcastle er gríðarlega erfitt heim að sækja, sérstaklega með þennan frábæra stuðning."
Athugasemdir