Tveimur síðustu leikjum dagsins er lokið í enska boltanum, þar sem Fulham skellti Tottenham með þremur mörkum gegn engu í ensku úrvalsdeildinni.
Rodrigo Muniz skoraði tvennu og gerði Sasa Lukic eitt mark í frábærum sigri.
Leikurinn sjálfur var opinn og skemmtilegur þar sem bæði lið fengu mikið af færum, en færanýting Tottenham var ekki nægilega góð og þá átti Bernd Leno stórleik á milli stanga heimamanna.
Fulham er í neðri hluta deildarinnar eftir þennan sigur, en þó aðeins fimm stigum frá evrópubaráttunni. Tottenham er áfram í fimmta sæti en þarna mistókst liðinu að komast uppfyrir Aston Villa og í meistaradeildarsæti.
Í enska bikarnum átti Manchester City heimaleik gegn Newcastle og stafaði lítil ógn af gestunum.
Heimamenn í Manchester voru við fulla stjórn og skoraði Bernardo Silva tvennu í fyrri hálfleik, en bæði mörkin komu eftir skot sem fóru af varnarmanni og í netið.
Gestirnir frá Newcastle gerðu sig ekki líklega til að minnka muninn og varð niðurstaðan þægilegur 2-0 sigur hjá Man City, sem er annað liðið til að tryggja sig í undanúrslit enska FA bikarsins á eftir Coventry City sem lagði Wolves að velli fyrr í dag.
Fulham 3 - 0 Tottenham
1-0 Rodrigo Muniz ('42 )
2-0 Sasa Lukic ('49 )
3-0 Rodrigo Muniz ('61 )
Manchester City 2 - 0 Newcastle
1-0 Bernardo Silva ('13 )
2-0 Bernardo Silva ('31 )
Athugasemdir