Það fóru þrír leikir fram í Bestu deild kvenna í kvöld þar sem Stjarnan lagði Val að velli í stórleik kvöldsins.
Stjörnukonur voru betri í fyrri hálfleik og tóku forystuna strax á áttundu mínútu, þegar boltinn datt fyrir Gunnhildi Yrsu Jónsdóttur innan vítateigs og sýndi hún mikla yfirvegun til að setja boltann í netið.
Úlfa Dís Kreye Úlfarsdóttir átti fyrirgjöfina sem endaði hjá Gunnhildi og tvöfaldaði hún svo forystuna sjálf eftir slæm mistök í vörn Vals. Úlfa vann boltann af Lillý Rut Hlynsdóttur hátt uppi á vellinum og kláraði sjálf.
Staðan var 2-0 í leikhlé og lögðu Valskonur allt í sóknarleikinn í síðari hálfleik, en boltinn rataði ekki í netið þrátt fyrir flotta spilamennsku Vals. Stjörnukonur vörðust gríðarlega vel og voru næstum búnar að gera þriðja mark leiksins úr skyndisókn í uppbótartíma.
Lokatölur 2-0 og Stjarnan jafnar Val þar með á stigum. Liðin deila öðru sæti Bestu deildarinnar, með sjö stig eftir fjórar umferðir.
Stjarnan 2 - 0 Valur
1-0 Gunnhildur Yrsa Jónsdóttir ('8)
2-0 Úlfa Dís Kreye Úlfarsdóttir ('26)
Selfoss og FH unnu þá sína fyrstu leiki á deildartímabilinu og eru bæði komin með fjögur stig eftir fjórar umferðir. Þau deildu botnsæti deildarinnar fyrir þessa umferð.
Liðin áttu bæði heimaleiki þar sem Selfoss lagði Tindastól á meðan FH hafði betur gegn Keflavík. Lokatölur úr báðum leikjum urðu 3-1.
Á Selfossi tók Tindastóll forystuna snemma leiks en heimakonum tókst að snúa dæminu við og vinna að lokum sannfærandi sigur. Katla María Þórðardóttir var atkvæðamest með tvö mörk.
Í Hafnarfirði tók FH tveggja marka forystu snemma leiks og hefði getað bætt fleiri mörkum við en tókst ekki. Keflavík komst aftur inn í leikinn með marki í síðari hálfleik og var gríðarleg spenna í Hafnarfirði.
Keflvíkingar komust grátlega nálægt því að skora jöfnunarmark en FH fékk einnig sín dauðafæri og hreint með ólíkindum að boltinn hafi ekki ratað í netið fyrr en í uppbótartíma, þegar Esther Rós Arnarsdóttir innsiglaði sigur heimakvenna.
Lestu um Selfoss 3 - 1 Tindastóll
Selfoss 3 - 1 Tindastóll
0-1 Melissa Alison Garcia ('13)
1-1 Katla María Þórðardóttir ('35)
2-1 Eva Lind Elíasdóttir ('43)
3-1 Katla María Þórðardóttir ('49)
FH 3 - 1 Keflavík
1-0 Arna Eiríksdóttir ('4)
2-0 Shaina Faiena Ashouri ('8)
2-1 Alma Rós Magnúsdóttir ('57)
3-1 Esther Rós Arnarsdóttir ('90)
