Torion og Sassuolo mættust í eina leik dagsins í Serie A deildinni en þetta var frestaður leikur.

Leikurinn var sérstaklega mikilvægur fyrir heimamenn í Torino en þeir eru í bullandi fallbaráttu og hafa verið í miklu basli á þessu tímabili.

Hlutirnir litu mjög illa út fyrir Torino en þegar tæplega korter var eftir af leiknum leiddu gestirnir frá Sassuolo með tveimur mörkum gegn engu. Domenico Berardi gerði bæði mörk gestanna.

Simone Zaza minnkaði hins vegar muninn fyrir Torino á 77. mínútu og það gaf liðinu mikla orku. Fjórum mínútum fyrir leikslok jafnaði Rolando Mandragora metin og á 90. mínútu var Zaza aftur á ferðinni.

Leikmenn Torino fögnuðu sigurmarkinu mikið en þetta voru risa stór stig fyrir þá. Með sigrinum komst Torino upp fyrir Cagliari og úr fallsæti.

Í ítölsku C-deildinni vann Padova 4-0 heimasigur á FeralpiSalo. Padova er í efsta sæti eftir 31 leik með tveggja stiga forskot.

Emil Hallfreðsson byrjaði á varamannabekknum í dag en kom inn á þegar sjö mínútur voru eftir af venjulegum leiktíma.