„Við vorum að koma saman í dag, spennan stigmagnast. Maður er ekki búinn að taka púlsinn á öllum hópnum, en þekkjandi þetta lið þá veit ég að við ætlum að gera allt sem við getum til að nýta þetta einstaka tækifæri sem við erum í."

Ísland mætti Ísrael í riðlakeppni Þjóðadeildarinnar og enduðu báðir leikir með jafntefli. Alfreð lék ekki með íslenska liðinu í þeim leikjum.

„Talandi við strákana þá voru þetta leikir sem við gátum unnið. Við vorum 2-1 yfir í Ísrael og komumst líka yfir heima. Tilfinningin eftir þá leiki var sú að það voru klárleg leikir sem við hefðum getað fengið meira úr. Án þess að vera búinn að grandskoða Ísrael þá myndi ég telja þetta 50-50 leik, það verða smáatriði sem munu skilja á milli hver vinnur á fimmtudaginn."

„Við fengum send vídeó til okkar, klippur frá þjálfurunum svona aðeins til að kveikja á mönnum í aðdraganda verkefnisins. Þú ert samt með þínu félagsliði og einbeitir þér þar að næsta leik. Núna er maður rétt kominn í landsliðið og við byrjum væntanlega í kvöld að skoða þá og þá smám saman færist einbeitingin yfir. Það er erfitt að neita því að maður sé ekki búinn að hugsa um þennan leik lengi. Þetta er risaleikur fyrir okkur og risa tækifæri að fara á stórmót. Við munum gera allt sem við getum."

Alfreð ræðir um stöðuna á Eupen sem er á leið í fallumspilið í Belgíu. Alfreð er ánægður að hafa tekið þátt í öllum leikjum til þessa á tímabilinu og hefur haldið sér heilum. Hægt er að sjá svör hans við spurningum um Belgíu og Gylfa Þór Sigurðsson í spilaranum efst.

Alltaf með sama markmið í landsliðinu
Landsliðsþjálfarinn Age Hareide var spurður út í leikformið á nokkrum leikmönnum liðsins á fréttamannafundi fyrir helgi. Þar tjáði hann sig um Alfreð, sem hefur ekki byrjað marga leiki að undanförnu, og sagði eftirfarandi.

„Alfreð hefur fengið fáar mínútur, en hann hefur mikilvægt hlutverk í liðinu þar sem hann getur talað við yngri leikmennina og hjálpað þeim á sinn hátt. Sem framherji getur hann verið mikilvægur á síðustu mínútunni. Hann getur verið mikilvægur af vítapunktinum. Ef við förum alla leið í vítaspyrnukeppni þá mun Alfreð taka eina af vítaspyrnunum."

Alfreð var spurður út í þessi ummæli. Býst hann við því að byrja á bekknum?

„Ég var ekkert búinn að spá of mikið í því. Ég kem alltaf með sama markmið í landsliðið og það er að hafa jákvæð áhrif á liðið, sama hvaða hlutverki það verður í, ég hreinlega veit það ekki, við höfum ekki farið í neina 'detaila' hvað það varðar. Ef mitt hlutverk verður að byrja inn á þá reyni ég að eins vel og ég get, ef það verður að koma inn á þá reyni ég að gera það sama. Ég ætla vona að við þurfum ekki að fara í vítaspyrnukeppni og klárum þetta fyrir það."

En ertu klár ef það þarf að taka víti?

„Alltaf, ég elska að taka víti," sagði Alfreð að lokum.

   15.03.2024 18:46

„Ef við förum alla leið í vítaspyrnukeppni þá mun Alfreð taka eina af spyrnunum"