„Ég hef verið mjög trúr og fundið mig í þriggja hafsenta kerfi undanfarin ár. Þar af leiðandi kom ég inn með þá "philosophyu" mína. Ég hef gert fína hluti með það kerfi. Við erum með marga fína hafsenta og upp á jafnvægið í hópnum þá passaði þetta kerfi mjög vel. Við höfum verið að ströggla með líkamlega heilsu hafsentana og það er eins og það hafi verið álög á varnarlínunni því við höfum misst marga út," sagði Óli Stefán í KA podcastinu.

Hallgrímur Jónasson, Haukur Heiðar Hauksson, Callum Williams, Torfi Tímoteus Gunnarsson, Brynjar Ingi Bjarnason og Ívar Örn Árnason hafa allir spilað í þriggja manna varnarlínu KA í sumar. Þrír þeirra fyrstnefndu hafa verið mikið meiddir og Ívar er núna farinn út í skóla til Bandaríkjanna.

Óli Stefán breytti í 4-2-3-1 í miðjum leik gegn HK í júlí eftir meiðsli hjá Torfa og hann gerði það aftur í síðari hálfleik gegn Breiðabliki í þessum mánuði áður en hann fór að nota kerfið frá byrjun leikja.

„Þetta hentar hópnum mjög vel. Við höfum verið að spila mjög vel í þessu leikkerfi og erum komnir inn í þetta að vinna 4-2-3-1," sagði Óli Stefán einnig.

Óli talar meira um leikkerfi í KA podcastinu en umræðan byrjar eftir 16 mínútur.