Rúnar Kristinsson og lærisveinar hans í KR gerðu enga frægðarför á Kópavogsvöll þegar liðið heimsótti Breiðablik í Bestu deild karla í kvöld. Gestirnir úr vesturbæ Reykjavíkur sáu lítið til sólar í leiknum og urðu lokatölur 4-0 grænum og glöðum Blikum í bil. Arnar Laudal var á vellinum í kvöld fyrir Fótbolta.net og spurði Rúnar hvort tapið væri eitt það sárasta með KR upp á síðkastið?
Lestu um leikinn: Breiðablik 4 - 0 KR
„Já upp á síðkastið, það er aldrei gaman að tapa 4-0 en það fór þannig í dag og við breytum því ekki úr þessu, Við áttum að nýta fyrri hálfleikinn betur þar sem við erum kannski sterkari aðilinn að mínu mati og pressuðum þá ágætlega og unnum boltann á góðum stöðum með fína möguleika á að bú til færi. En svo gefum við þeim mark á silfurfati og það er dýrt á móti liði eins og Breiðablik.“
Gjafamark var ekki það eina sem angraði KR í fyrri hálfleik en þegar skammt lifði fyrri hálfleiks fékk Breiðablik vítaspyrnu sem Höskuldur Gunnlaugsson skoraði af öryggi úr. Heimamenn gengu því með tveggja marka forskot í hálfleik en ekki tók betra við fyrir gestina í þeim síðari.
„Seinni hálfleikur var alltaf að fara að verða erfiður. En við ætluðum að reyna að snúa þessu í hálfleik og reyna að þrýsta á þá og koma inn einu marki og búa til leik úr þessu en um leið og þeir gera þriðja markið er þetta orðið mjög erfitt og þeir með fullt af sjálfstrausti eiga auðveldara með að spila í gegnum okkur.“
Sagði Rúnar en allt viðtalið má sjá hér að ofan þar sem hann ræðir meðal annars Finn Tómas Pálmason, Kjartan Henry og bikarleik gegn Njarðvík sem fram fer um næstu helgi.
Athugasemdir