Þorsteinn sagði frá því á fréttamannafundi að júlíglugginn yrði leiðinlegur.

„Ég held að það sé jákvætt að það sé stutt á milli. Þá ertu stöðugt að spila þessa keppnisleiki og ég held að það sé jákvætt. Þó finnst mér þessi júlígluggi alveg út úr korti. Hann er skrítinn því vetrardeildirnar eru að koma úr sumarfríi og eru að fara inn í undirbúningstímabil. Þá fara þær beint í landsleikjaglugga. Það er ekki draumastaða varðandi ástand leikmanna," sagði Þorsteinn en leikmenn úr stærstu deildum Evrópu eru þá jafnvel að mæta á sínar fyrstu æfingar á undirbúningstímabili í mikilvægu landsliðsverkefni.

Jonker tekur undir með Steina að þessi gluggi sé út úr korti og verið sé að taka karlabolta fram yfir kvennabolta hjá UEFA.

„Þetta er algjört kaos," sagði Jonker. „Við þurfum að spila leik í undankeppni EM þann 16. júlí, um mitt sumar. Hvernig eigum við að gera það þegar tímabilið klárast í maí?"

„Þetta er vandamál og þetta hefur með það að gera UEFA vill ekki að við séum að spila á sama tíma og karlaboltinn. Þá verður dagatalið fullt. Karlar hafa forganginn og konurnar eiga bara að sætta sig við það. Þetta er ekki ásættanlegt."

Leikir Íslands í undankeppni EM 2025:
Ísland - Pólland föstudaginn 5. apríl
Þýskaland - Ísland þriðjudaginn 9. apríl
Austurríki - Ísland föstudaginn 31. maí
Ísland - Austurríki þriðjudaginn 4. júní
Ísland - Þýskaland föstudaginn 12. júlí
Pólland - Ísland þriðjudaginn 16. júlí