Anna Björk Kristjánsdóttir bar fyrirliðabandið er botnlið Le Havre tapaði enn eina ferðina í efstu deild franska boltans.

Andrea Rán Hauksdóttir byrjaði á miðjunni og var Berglind Björg Þorvaldsdóttir í fremstu víglínu.

Reims tók forystuna í fyrri hálfleik en Le Havre jafnaði fyrir leikhlé. Reims komst aftur yfir í síðari hálfleik og ekki tókst Íslendingaliðinu að jafna.

Lokatölur urðu því 2-1 og er Le Havre áfram með fimm stig á botni deildarinnar, eftir sautján umferðir. Le Havre er þó aðeins sex stigum frá öruggu sæti í deildinni.