„Þetta eru frábærar fréttir enda hafa bræðurnir verið ákaflega öflugir í gula og bláa búningnum og orðnir algjörir lykilmenn í KA liðinu," segir í tilkynningu KA.

Bræðurnir, sem eru 22 ára, gengu til liðs við KA fyrir sumarið 2019. Þar áður voru þeir á mála hjá Dalvík/Reyni og hjá Hannover 96 í Þýskalandi.

Nökkvi Þeyr er framherji og skoraði hann þrjú mörk í 19 leikjum í sumar. Hann er núna í heildina búinn að skora átta mörk í deild og bikar fyrir KA.

Þorri Mar leikur aftar á vellinum og stóð sig frábærlega í stöðu bakvarðar á nýliðnu tímabili. Hann var verðlaunaður fyrir frammistöðu sína með því að vera kjörinn efnilegasti leikmaður KA.

KA endaði í fjórða sæti Pepsi Max-deildarinnar á tímabilinu sem var að klárast.