Xhaka var útnefndur fyrirliði Arsenal í lok september en hann kom til félagsins frá Borussia Monchengladbach árið 2016.

Það hefur ekki verið mikið jafnvægi í leik hans með Arsenal og hefur hann oft verið gagnrýndur af stuðningsmönnum en hann virtist fá nóg í gær.

Í stöðuni 2-2 var honum skipt af velli en stuðningsmenn bauluðu á hann og voru ósáttir við að hann hafi ekki flýtt sér af velli. Xhaka brást illa við og sagði þeim að fara til andskotans áður en hann klæddi sig úr treyjunni.

Það hefur verið kallað eftir því að hann verði sviptur fyrirliðabandinu en Arsenal hefur ekki enn sent frá sér yfirlýsingu vegna málsins.

Bellerin, liðsfélagi hans hjá Arsenal, ver hann á Twitter.

„Við erum öll mennsk og höfum öll tilfinningar og stundum er erfitt að eiga við þær. Núna þurfum við að hjálpast að í stað þess að ýta frá okkur. Við getum bara unnið þegar við erum heild," sagði Bellerin á Twitter.