Í dag, 30. desember, verður lokað í verslunum Jóa útherja vegna útfarar Magnúsar V. Péturssonar stofnanda verslunarinnar.
Útförin verður klukkan 13:00 í Neskirkju.
Magnús V. Pétursson, Maggi Pé, var einn ástsælasti fótboltadómari þjóðarinnar en hann lést á Landspítalanum 9. desember síðastliðinn. Hann var fæddur 31. desember árið 1932 og hefði því orðið níræður á morgun, gamlársdag.
Magnús var mjög áberandi í dómgæslu hér á landi en var líka milliríkjadómari og dæmdi fjölda leikja á erlendri grundu þar sem hann kynntist mörgum goðsögnum fótboltans.
Magnús var í hópi þeirra 38 drengja sem stofnuðu knattspyrnufélagið Þrótt árið 1949.
Hann stofnaði einnig verslunina Jóa útherja árið 1999 ásamt Valdimar syni sínum sem stýrir fyrirtækinu í dag.
Maggi Pé þótti einstaklega skemmtilegur maður og í byrjun árs 2014 var hann gestur í útvarpsþættinum Fótbolta.net og sagði skemmtilegar sögur úr fótboltanum.
Fótbolti.net vottar aðstandendum og vinum Magga samúð sína.
Smelltu hér til að hlusta á sögustund Magga í útvarpsþættinum Fótbolta.net
