Roma hafði betur gegn Fiorentina og skoraði vængbakvörðurinn Leonardo Spinazzola snemma leiks eftir góða sendingu upp völlinn frá markverði Rómverja, Antonio Mirante.

Roma sýndi yfirburði í leiknum og gaf ekki færi á sér. Gestirnir frá Flórens virkuðu hugmyndasnauðir gegn yfirveguðum heimamönnum.

Pedro tvöfaldaði forystuna á 70. mínútu eftir góða sendingu frá Henrikh Mkhitaryan og var Edin Dzeko nálægt því að bæta þriðja markinu við á lokamínútunum, skömmu eftir að hafa orðið fyrir ljótri tæklingu af hendi Lucas Martinez Quarta sem fékk beint rautt spjald fyrir.

Roma er komið með ellefu stig eftir sex umferðir. Fiorentina er með sjö stig.

Roma 2 - 0 Fiorentina
1-0 Leonardo Spinazzola ('12)
2-0 Pedro ('70)
Rautt spjald: Martinez Quarta, Fiorentina ('89)

Í Napolí tóku lærisveinar Rino Gattuso á móti léttleikandi sóknarliði Sassuolo, sem var þó án þriggja lykilmanna í sóknarlínunni.

Domenico Berardi, Filip Djuricic og Francesco Caputo eru allir meiddir. Caputo og Berardi eru að glíma við meiðsli á hæl á meðan Djuricic lenti í vöðvameiðslum.

Sassuolo er lið sem skorar mikið og fær mikið af mörkum á sig en í dag var lögð aukaleg áhersla á vörnina, sem skilaði sér með fræknum sigri.

Heimamenn í liði Napoli voru betri stærstan hluta leiksins en staðan var markalaus þar til Manuel Locatelli, miðjumaður Sassuolo, skoraði úr vítaspyrnu snemma í síðari hálfleik.

Napoli jók sóknarþungann í kjölfarið og var leikurinn afar spennandi, allt þar til í uppbótartíma þegar Maxime Lopez innsiglaði sigurinn með marki eftir skyndisókn.

Sigurinn fleytir Sassuolo upp í 2. sæti í Serie A, þar sem liðið er aðeins tveimur stigum eftir toppliði AC Milan. Napoli er í fimmta sæti, þremur stigum eftir Sassuolo.

Napoli 0 - 2 Sassuolo
0-1 Manuel Locatelli ('58, víti)
0-2 Maxime Lopez ('95)