Króatíski sóknarmaðurinn Ante Budimir var hetja Osasuna í 1-0 sigri liðsins á Deportivo Alaves í La Liga á Spáni í kvöld.

Heimamenn í Osasuna urðu fyrir áfalli snemma leiks er Kike Barja, einn besti maður liðsins, meiddist. Osasuna tókst samt sem áður að skapa nokkur hættuleg færi í hálfleiknum en Antonio Sivera gerði vel að verja skalla frá þeim Budimir og David Garcia.

Samu Omorodion fékk besta færi Alaves er hann setti boltann í stöng undir lok hálfleiksins. Hann kom sér í annað gott færi í síðari hálfleiknum en þá varði Sergio Herrera frá honum á nærstönginni.

Sigurmarkið kom fyrir rest og var það nokkuð verðskuldað. Ante Budimir skoraði þá eftir sendingu Ruben Garcia. Alaves setti menn ofar á völlinn til að ná í jöfnunarmark en það kom aldrei og lokatölur því 1-0 Osasuna í vil.

Osasuna hefur ekki tapað í síðustu fjórum leikjum sínum og er nú í 10. sæti með 36 stig á meðan Alaves er í 13. sæti með 29 stig.