„Ef markaskorun er spurningin er Sigurður Bjartur Hallsson ekki svarið. Hann gerir fullt fyrir þig, hann pressur og hleypur og djöflast í 90 mínútur en þetta er ekki tíu marka maður," segir Tómas í útvarpsþættinum Fótbolti.net.

„Ég er hrifinn af honum. Ég man þegar ég spilaði á móti honum í 1. deildinni, þá var erfitt að eiga við hann. Hann er ofboðsleg skepna og fljótur. Hans er tækifærið," segir Baldur Sigurðsson sem var sérstakur gestur þáttarins.

Sigurður Bjartur skoraði fimm mörk í 21 leik fyrir KR í Bestu deildinni á síðasta ári og gerði fjögur tímabilið þar á undan. Hann raðaði hinsvegar inn mörkum í Lengjudeildinni 2021 fyrir Grindavík.

FH er spáð sjötta sæti Bestu deildarinnar í ótímabæru spá útvarpsþáttarins sem opinberuð var á laugardag. Það er mánuður í mót.

„Ef FH ætlar að gera eitthvað í sumar verða Kjartan Kári (Halldórsson) og Vuk (Oskar Dimitrijevic) að stíga upp. Tveir leikmenn sem eru búnir að rúlla yfir Lengjudeildina. Það var talað vel um Vuk í byrjun tímabils í fyrra en hann skoraði tvö mörk. FH verður að fá meira úr þessum mönnum," segir Valur Gunnarsson sérfræðingur Fótbolta.net.