Baldur Sigurðsson getur tekið undir þetta:

„Ef við horfum á staðreyndirnar, leikmenn sem þeir eru búnir að fá, úrslitin og það. Þá er þetta jákvætt. Það er gott að sjá Skagalið sem er með svona gang. Ég get alveg séð þá fara um miðja deild og jafnvel herja á efri hlutann ef þeir eru í þannig gír, ég hef það mikla trú á þeim," segir Baldur.

Stærsta spurningamerkið markvörðurinn
„Oliver Stefánsson verður í ákveðnum hefndarhug í vörninni, kominn heim og reynir að sanna sig. Svo hinumegin á toppnum þarf Viktor Jónsson að haldast heill. Ef hann gerir það þá vitum við að hann getur skorað mörk. Spurningamerkin eru líka til staðar og ef þau falla röngu megin þá gæti þetta líka orðið ströggl," segir Baldur.

Valur bendir þá á að markvarðarstaðan sé einnig spurningamerki en í þættinum var talað um að auknar efasemdarraddir væru á Akranesi og rætt um hvort rétt væri að sækja nýjan markvörð.

„Stærsta spurningamerkið er auðvitað markvörðurinn Árni Marinó (Einarsson)," segir Valur.

Heimildarþættirnir Skaginn vöktu mikla athygli á RÚV í vetur þar sem gullaldarár ÍA voru rifjuð upp. Baldur mælir með því fyrir leikmenn að renna þáttunum í gegn fyrir mót.

„Ég hef ekki spilað fyrir Skagann en bara að horfa á þessa seríu veitti mér þvílíkan innblástur. Ef ég væri að spila fyrir ÍA þá myndi ég taka seríuna viku fyrir mót og koma svo inn í fyrsta leik," segir Baldur.