Meðalaldur leikmanna danska félagsins FC Nordsjælland hljóðaði upp á 20 ár og 142 daga í 1-0 tapi gegn AaB í dönsku úrvalsdeildinni um helgina.
Um er að ræða met í Danmörku en aldrei áður hefur byrjunarlið verið skipað svo ungum leikmönnum.
Nordsjælland hefur lagt mikinn metnað í unglingastarf sitt og ungir leikmenn hafa verið duglegir að fá tækifæri með aðalliðinu undanfarin ár.
15 af 18 leikmönnum í hópnum hjá Nordsjælland gegn AaB ólust upp hjá félaginu.
Rúnar Alex Rúnarsson fór frá Nordsjælland í sumar eftir að hafa varið mark liðsins undanfarin ár. Franska félagið Dijon keypti Rúnar Alex en hann var í liði umferðarinnar í fyrstu umferðinni um helgina.
Ólafur Kristjánsson, þjálfari FH, var áður við stjórnvölinn hjá Nordsjælland en hann stýrði liðinu 2014 og 2015.
Athugasemdir
