Ótrúlegt atvik átti sér stað þegar fréttamaður frá BBC tók almenning í Liverpool í götuspjall í aðdraganda grannaslagsins á milli Everton og Liverpool í ensku úrvalsdeildinni í gær.

Fréttamaðurinn hitti á förnum vegi eldri mann og spurði hann hvort hann myndi eftir hinum magnaða bikarleik á milli liðanna í fimmtu umferð enska bikarsins árið 1967, sem fram fór á Goodison Park.

Ekki nóg með að maðurinn myndi eftir leiknum, hann spilaði í honum! Fréttamaðurinn hitti nefnilega þarna á Tommy Lawrence, fyrrum markvörð Liverpool sem stóð á milli stanganna í þessum umrædda leik.

Myndband af þessum skemmtilega hittingi má sjá hér að neðan, en Lawrence var markvörður Liverpool frá 1957 til 1971.