Patro Eisden tapaði 4-0 í fyrri leik liðanna og reyndist það of stórt fyrir Stefán og félaga.

Hann byrjaði gegn Deinze í dag. Liðið komst í forystu á 18. mínútu sem gaf því örlitla von á kraftaverk en Deinze gerði út um þær vonir með tveimur mörkum á níu mínútum í síðari hálfleik.

Fyrsta tímabili Stefáns í Belgíu er því formlega lokið. Hann skoraði 7 mörk í 25 deildarleikjum, sem er ágætis byrjun á atvinnumannaferli hans.

Íslensku strákarnir í Venezia töpuðu fyrir Catanzaro, 3-2, í B-deildinni á Ítalíu.

Bjarki Steinn Bjarkason var í byrjunarliði Venezia og kom boltanum í netið gegn sínum gömlu félögum, en markið var dæmt af vegna rangstöðu.

Bjarki lék allan leikinn og þá kom Mikael Egill Ellertsson inn af bekknum þegar tuttugu mínútur voru eftir.

Þetta var þungt tap fyrir Venezia, sem er 3. sæti með 67 stig, fjórum stigum á eftir Como. Cesc Fabregas og hans menn í Como eru því einum sigri frá því að komast upp í efstu deild og útlit fyrir að Venezia sé á leið í umspil.

Birkir Bjarnason kom inn af bekknum er Brescia gerði 2-2 jafntefli við Feralpi Salo í B-deildinni. Brescia er í 8. sæti, sem gefur þátttökurétt í umspilið, þegar tveir leikir eru eftir.