Fjárfestingafélagið er styrkt af sádí-arabísku konungsfjölskyldunni og setja mannréttindasamtökin Amnesty International stórt spurningarmerki við kaupin.

Guardian greinir frá því að eigendaskiptin verði staðfest á næstu vikum og að Sádarnir borgi 310 milljónir punda fyrir Newcastle.

„Við verðum að opna augun og sjá hvað er að gerast í raun og veru: Sádí-Arabía er að nota frægð og orðstír ensku úrvalsdeildarinnar sem tól til að draga athyglina frá mannréttindabrotum landsins," segir Felix Jakens, yfirmaður Amnesty í Bretlandi.

„Undir stjórn Mohammed bin Salman hefur mannréttindabrotum í Sádí-Arabíu fjölgað. Nú er heimurinn í kreppu og þess vegna hafa þessi eigendaskipti ekki fengið mikla athygli. Þetta eru kaup sem kalla á frekari athugun, þetta eru kaup sem þarf að grannskoða."