Baráttan um að komast á meðal efstu fjögurra liðanna í ensku úrvalsdeildinni er enn opin. Chelsea, liðið sem er núna í fjórða sæti, gerði jafntefli við Brighton á útivelli.
Cesar Azpilicueta, fyrirliði Chelsea, skoraði fyrsta markið í leiknum eftir tíu mínútur. Boltinn féll til hans eftir að Brighton bjargaði á línu eftir tilraun Tammy Abraham.
Staðan var 1-0 í hálfleik, en heimamönnum í Brighton tókst að jafna metin á 84. mínútu. Það var varamaðurinn Alireza Alireza Jahanbakhsh sem skoraði og ekki var markið af ódýrari gerðinni. Markið gerði hann með hjólhestaspyrnu.
📸 What. A. Goal.
— Premier League (@premierleague) January 1, 2020
A Happy New Year for Alireza Jahanbakhsh!#BHACHE pic.twitter.com/fsBecAwTQI
Svakalegt mark, hans annað mark fyrir félagið. Hann skoraði sitt fyrsta mark í 2-0 sigri á Bournemouth í síðustu viku og lýsti því sem tilfinningaþrunginni stund.
Brighton var ef eitthvað er líklegra liðið til að vinna leikinn eftir jöfnunarmarkið, en fleiri mörk voru ekki skoruð. Lokatölur 1-1 og er Chelsea núna með fimm stiga forystu á Manchester United, sem er í fimmta sæti. Man Utd mætir Arsenal í kvöld. Brighton er í 13. sæti með 24 stig.
Það fór annar leikur fram á sama tíma og þar hafði Aston Villa betur gegn Burnley á útivelli.
Villa leiddi 2-0 í hálfleik, en það hefði verið 3-0 ef ekki hefði verið fyrir rangstöðumark sem var dæmt af liðinu. Mjög naumt, en VAR skarst í leikinn eins og svo oft áður.
Jóhann Berg Guðmundsson kom inn á í hálfleik fyrir Burnley. Chris Wood minnkaði muninn þegar tíu mínútur voru eftir af venjulegum leiktíma, en ekki voru fleiri mörk skoruð og 2-1 Aston Villa staðreynd.
Aston Villa kemur sér upp úr fallsæti með þessum sigri og er núna í 16. sæti með 21 stig. Burnley er með 24 stig í 14. sæti.
Brighton 1 - 1 Chelsea
0-1 Cesar Azpilicueta ('10 )
1-1 Alireza Jahanbakhsh ('84 )
Burnley 1 - 2 Aston Villa
0-1 Wesley ('27 )
0-2 Jack Grealish ('41 )
1-2 Chris Wood ('80 )
Klukkan 15:00 hefjast þrír leikir. Smelltu hér til að sjá byrjunarliðin.
Athugasemdir