Guðni Bergsson.
Í vikunni seldist upp á leik Íslands og Kosóvó á nokkrum mínútum líkt og fyrir alla heimaleiki Íslands undanfarin ár. KSÍ vill stækka Laugardalsvöll en Reykjavíkurborg, aðaleigandi vallarins, og ríkið þurfa einnig að koma að uppbyggingu á vellinum. Guðni Bergsson, formaður KSÍ, vonast til að það fari loksins að draga til tíðinda varðandi uppbyggingu vallarins.
„Málin standa ágætlega. Við erum búin að kynna þetta fyrir hagsmunaaðilum og vinna góða greiningarvinnu á því hvaða valkostir eru í stöðunni," sagði Guðni við Fótbolta.net í dag.
„Ég vil vera bjartsýnn á að þetta geti allt saman gengið eftir. Ákvörðunin er ekki okkar ein. Við erum að vinna í þessu örugglega og ég vona að hægt sé að fara yfir málið og kynna það áður en langt um líður og þá vonandi með góða niðurstöðu í farteskinu. Við erum að vona að þetta komi fljótlega í ljós."
Guðni hafði áður sagt að hann vonaðist til að hægt yrði að kynna hugmyndir um nýjan Laugardalsvöll í ágúst. Svo varð þó ekki.
„Ég er svo bjartsýnn. Við þurfum að gefa þessum aðilum sem eru að skoða málið ákveðið svigrúm. Fyrir vikið tafðist þetta umfram það sem maður var að vonast til en maður þarf að sýna skilning á því. Við erum að tala um einhverjar vikur. Hvort það verði ein eða tíu vikur veit ég ekki en ég held að það verði ekki langt í þetta verði kynnt almennilega hvað við erum að hugsa í þessum efnum."
Guðni segir að ekki sé verið að skoða annan stað fyrir þjóðarleikvang heldur en í Laugardalnum. „Það er ekkert annað í kortunum. Við einblínum á það," sagði Guðni.
Hér að ofan má sjá viðtalið við Guðna í heild sinni.
Sjá einnig:
Draumur Guðna að fá þak yfir völlinn - Gervigras ekki á dagskrá
Úttekt: Laugardalsvöllur og mýtan um uppselda leiki
Athugasemdir
