Franska félagið Paris Saint-Germain er í viðræðum við Everton um að halda ítalska framherjanum Moise Kean á láni út næstu leiktíð. Það er ítalski félagaskiptasnillingurinn Fabrizio Romano sem greinir frá þessu.
Þessi 21 árs gamli framherji kom til PSG á láni frá Everton fyrir síðustu leiktíð en náði engan veginn að finna sig á Englandi og kom því á óvart að hann hafi verið lánaður í eitt stærsta félag heims.
Kean náði hins vegar á slökkva í gagnrýnisröddum og skoraði 17 mörk í 41 leik fyrir PSG á tímabilinu. Hann fann sig í franska boltanum og náði að tengja vel við ofurstjörnurnar.
PSG vill halda Kean áfram en er þó ekki tilbúið að borga 45 milljónir evra fyrir hann.
Félagið vill fá hann á láni í eitt ár til viðbótar en Everton vill bíða með að ákveða framtíð hans. Félagið vill ráða nýjan stjóra fyrst og sjá hvað hann vill gera með Kean.
Athugasemdir