Félagið sendi tölvupóst á KSÍ vel tímanlega og óskaði eftir miða fyrir sinn fulltrúa á leikinn.

Um var að ræða staðlaðan póst frá enska félaginu sem það sendir á knattspyrnusambönd um allan heim þegar njósnarar á þeirra vegum mæta á leiki.

KSÍ tók vel í beiðnina og danskur njósnari frá Man Utd var sendur af stað í verkefnið. Hann mætti hinsvegar galvaskur á Laugardalsvöll í gær og skildi ekkert afhverju öll ljós væru slökkt og enginn heima.

Þegar hann loks náði í fulltrúa frá KSÍ var honum tjáð að leikurinn færi fram hinum megin á hnettinum, í Katar, og því ljóst að hann átti engan möguleika á að ná honum.

Sá danski þurfti því að sætta sig við borgarferð í frostinu í Reykjavík í stað þess að spóka sig um í 30 stiga hita í sólinni í Katar. Gengur vonandi betur næst hjá enska félaginu og vonandi eru þeir að skoða einhvern leikmanna íslenska liðsins.

Leiknum hérna í Katar lauk svo með 1-2 sigri Tékka í gær en Kjartan Henry Finnbogason var besti leikmaður Íslands og skoraði mark okkar.