Elías Már Ómarsson var í byrjunarliði Excelsior og lék allan leikinn þegar liðið tapaði gegn Volendam á heimavelli.
Volendam leiddi 2-0 eftir fyrri hálfleikinn. Excelsior minnkaði muninn þegar 20 mínútur voru eftir af venjulegum leiktíma, en lengra komust þeir ekki.
Fyrsta mínútan í leiknum í kvöld var ekki spiluð, eins og í öllum öðrum leikjum í tveimur efstu deildunum í Hollandi um helgina. Þetta gera leikmenn til að vekja athygli á baráttunni við kynþáttafordóma.
Kveikjan að þessu átaki eru kynþáttafordómar sem Ahmad Mendes Moreira leikmaður Excelsior varð fyrir frá stuðningsmönnum Den Bosch um síðustu helgi.
Excelsior er í sjöunda sæti hollensku B-deildarinnar með 25 stig eftir 16 leiki. Excelsior féll úr deild þeirra bestu í Hollandi á síðasta tímabili.
Ari spilaði í tapi gegn Club Brugge
Í belgísku úrvalsdeildinni spilaði landsliðsmaðurinn Ari Freyr Skúlason með Oostende í tapi gegn Club Brugge.
Á 36. mínútu missti Oostende mann af velli með rautt spjald, en þá var staðan 1-0 fyrir Club Brugge. Rauða spjaldið hjálpaði auðvitað Oostende ekki, en leikurinn endaði 2-0.
Oostende er í 14. sæti belgísku úrvalsdeildarinnar með 12 stig eftir 16 leiki. Á meðan er Club Brugge á toppnum með átta stiga forskot.
Athugasemdir