Danski sóknarmaðurinn Gustav Isaksen var hetja Lazio sem vann 1-0 sigur á Milan í Seríu A á Ítalíu í dag.

Isaksen skoraði sigurmarkið á 26. mínútu eftir að Adam Marusic kom löngum bolta fram völlinn. Isaksen fór illa með Pervis Estupinan sem rann á grasinu og komst Isaksen einn gegn Mike Maignan og skoraði.

Milan fékk urmul af færum til að koma til baka. Christian Pulisic fór illa með góð færi.

Í seinni hálfleiknum kom Zacary Athekame boltanum í netið eftir hornspyrnu Luka Modric en markið var dæmt af þar sem þessi leikmaður U21 árs landsliðs Sviss handlék boltann í aðdragandanum.

Rafael Leao, ein af stjörnum Milan-liðsins, bauð upp á smá dramatík um miðjan síðari hálfleikinn er honum var skipt af velli, en hann var allt annað en sáttur og kunni ekki vel við knúsið sem hann fékk frá Max Allegri, þjálfara liðsins.

Christopher Nkunku kom inn í hans stað og átti fína spretti, en Milan fann ekki jöfnunarmarkið og urðu lokatölur 1-0 Lazio í vil.

Slæm úrslit fyrir Milan sem átti möguleika á að saxa forystu nágranna þeirra í Inter niður en köstuðu því frá sér. Inter er því áfram með átta stiga forystu en Milan í öðru sæti. Lazio er í 9. sæti með 40 stig.

Lazio verður án Maurizio Sarri, þjálfara liðsins, í næsta leik en hann sá rautt spjald seint í uppbótartíma.

Smelltu hér til að kaupa áskrift að Livey