Ólafur Helgi Kristjánsson, þjálfari FH, var ekki parsáttur við dómgæsluna í leik liðs síns gegn Víkingi R. í gærkvöldi. Víkingur sigraði leikinn 4-1 og var það helst dómgæslan í þriðja marki Víkinga, þegar Óttar Magnús Karlsson skorar úr snöggri aukaspyrnu, sem fór illa í Óla. Pétur Guðmundsson var dómari leiksins og Helgi Mikael Jónsson 4. dómari.
„Skrípaleikur bara. Frábær dómgæsla ef það var þannig að boltinn var kyrr og hann vill hafa flot í leiknum. Það er þá í fyrsta skipti í Pepsi Max deildinni sem þeir láta leikinn fljóta. Frá mínum bæjardyrum var hann að tala við mína leikmenn og Gunnar var ekki í markinu. Helgi segir við mig sem fjórði dómari að hann hafi talað við hann hérna, af línunni,“ sagði Óli við Vísi og hélt áfram.
„Sami dómari var í bikarúrslitaleik í fyrra þar sem hann naut aðstoðar fjórða dómara en hann kaus að taka ekki mark á honum hér í dag. Við töpum samt ekki út af dómgæslunni, við vorum slakir en þetta var skondið mark."
Óli hafði svipaða sögu að segja í viðtali við mbl.is eftir leikinn.
„Frábær dómgæsla, að leyfa leiknum að fljóta og Pétur er þá að gefa ákveðið fordæmi um að það megi taka aukaspyrnur hratt. Ég fagna því,“ sagði Ólafur. Blaðamaður mbl.is bætti við eftirfarandi orðum í greinina sem var unnin upp úr svari Ólafs: „og sitt sýnist hverjum um hvað megi lesa á milli línanna þar."
Athugasemdir
