Hansi Flick, þjálfari Bayern München í Þýskalandi, segir að félagið hafi lagt allt í að halda spænska miðjumanninum Thiago en það er útlit fyrir að hann sé á leið til enska úrvalsdeildarliðsins Liverpool.
Fjölmargir miðlar frá bæði Englandi og Þýskalandi fullyrða að Liverpool er búið að ganga frá samkomulagi við Thiago og að hann verði keyptur frá Bayern á rúmlega tæpar 35 milljónir punda.
Spánverjinn hefur verið einn besti leikmaður þýsku deildarinnar síðustu ár en hann á aðeins eitt ár eftir af samningnum sínum hjá Bayern.
Bayern bauð honum nýjan samning en hann hyggst þó ekki framlengja. Flick heldur þó enn í vonina en skilur þó að Thiago vilji söðla um og spila í öðru landi.
„Málið er að ég held alltaf í vonina. Ég er mjög jákvæður á þessa hluti," sagði Flick eftir bikarsigur liðsins gegn Bayer Leverkusen í gær.
„Ég veit þó líka að þegar maður er á ákveðnum aldri og þú hefur þegar spilað í spænsku deildinni með Barcelona og þýsku deildinni með Bayern München þá er þörf á því að prófa að spila í annarri deild. Þetta er mjög eðlilegt og mannlegt. Ég er að reyna mitt besta að sannfæra Thiago um að vera áfram. Tíminn verður þó að leiða það í ljós."
„Við eigum eftir að klára Meistaradeildina og erum með stór plön og hann er klárlega partur af þeim," sagði hann í lokin.
Athugasemdir