Ísland vann frægan sigur í Hreiðrinu í Nice 2016.
Jóhann í landsleik gegn Portúgal.
Það voru örfáir enskir blaðamenn mættir á fréttamannafund íslenska landsliðsins á Wembley í dag. Einbeiting ensku pressunnar fer svo sannarlega á þeirra eigin lið enda er fréttamannafundur bráðlega hjá Gareth Southgate sem fram fer á æfingasvæði Tottenham.
Verið er að skera hóp Englands niður fyrir Evrópumótið og það er skiljanlega stærsta fréttaefnið hjá heimamönnum.
Verið er að skera hóp Englands niður fyrir Evrópumótið og það er skiljanlega stærsta fréttaefnið hjá heimamönnum.
En fyrsta spurningin á fréttamannafundi Íslands var frá enskum blaðamanni á Jóhann Berg Guðmundsson fyrirliða. Hann spurði út í frægan sigur Íslands gegn Englandi í 16-liða úrslitum EM 2016 og hversu stórt það hafi verið fyrir þjóðina.
Jóhann Berg svaraði að það hefði verið draumur að spila gegn Englandi á stórmóti og enginn hafi haft trú á íslenska liðinu í þeim leik.
„Þetta er ein af þeim stundum sem hjálpaði íslenskum fótbolta í heild sinni. Það sýndi að allt er mögulegt með rétta liðsandanum," sagði Jóhann.
Klukkan 18:45 annað kvöld mætast England og Ísland í vináttulandsleik á Wembley. Ísland leikur svo gegn Hollandi í Rotterdam á mánudaginn.
Fín æfing fyrir það sem koma skal
Jóhann var spurður að því hvernig þessir tveir leikir gætu nýst íslenska landsliðinu upp á framhaldið.
„Við þurfum bara að byggja enn frekar ofan á það sem við höfum verið að gera. Í síðustu undankeppni vorum við að prófa fullt af hlutum. Nýr þjálfari kemur inn með nýjar áherslur en mér fannst í lokin að við værum komnir með ákveðna formúlu sem gæti virkað," segir Jóhann.
„Við vorum grátlega nálægt því að koma okkur inn á Evrópumótið og nú er bara að byggja ofan á það. Við vitum að þetta eiga eftir að verða gríðarlega erfiðir leikir. Við getum fullt tekið úr þessu, við getum þorað að spila á móti svona þjóðum. Ef við ætlum okkur á stórmót þá þurfum við að ná einhverju á móti svona liðum. Þetta er góð æfing fyrir það sem koma skal."
Athugasemdir
