Arsenal heimsótti London Stadium, heimavöll West Ham, í kvöld. Liðin voru ísköld fyrir leikinn í kvöld, West Ham nálægt fallsæti og Arsenal ekki unnið leik í deildinni síðan í október.

Arsenal kom ekki fullmannað inn í leikinn í kvöld því Hector Bellerin gat ekki hafið leik vegna meiðsla. Ainsley Maitland-Niles hóf leik í stað Bellerin og Sead Kolasinac kom inn á bekkinn. Eftir tæplega hálftíma leik þurfti Kolasinac að koma inn á þegar Kieran Tierney varð fyrir slæmum axlarmeiðslum.

Á 38. mínútu komust heimamenn yfir með marki frá Angelo Ogbonna. Ogbonna kom boltanum yfir línuna og þurfti VAR að staðfesta að boltinn hafi ekki farið í hönd Ogbonna þegar hann skoraði.

1-0 í hálfleik og vonleysið mikið hjá Arsenal. Líkt og gegn Brighton á fimmtudag komu leikmenn Arsenal betur inn í seinni hálfleikinn. Á 60. mínútu átti varamaðurinn Kolasinac flotta fyrirgjöf á Martinelli, sem var að byrja sinn fyrsta leik í deild fyrir Arsenal. Martinelli kláraði vel og jafnaði leikinn.

Sex mínútum síðar kom Nicolas Pepe Arsenal yfir með gullfallegu skoti úr teignum. Pierre-Emerick Aubameyang lagði boltann á Pepe í teignum og Frakkinn skoraði með góðu skoti framhjá David Martin, markverði West Ham.

Þrem mínútum seinna skoraði Aubameyang sjálfur og launaði Pepe honum greiðann frá því í öðru markinu með sendingu í þessu þriðja marki Arsenal. Þess má geta að Arsenal skoraði úr öllum þremur skotum sínum á markið í kvöld.

Mörkin urðu ekki fleiri og langþráður sigur Arsenal í deildinni staðreynd, sá fyrsti síðan 6. október í deildinni! Þetta var þá fyrsti sigur Freddie Ljungberg sem bráðabirgðastjóri hjá Arsenal.