Franska félagið Bordeaux fór alla leið í átta-liða úrslit Meistaradeildarinnar fyrir tólf árum síðan, en núna eru breyttir tímar þar á bæ.
Bordeaux mun á næstu leiktíð spila í þriðju deild franska fótboltans, en greint var frá þessu í dag.
Liðið féll úr deild þeirra bestu á tímabilinu sem var að klárast og átti að spila í B-deild á komandi keppnistímabili, en núna hefur því verið breytt.
Fjármál félagsins eru ekki á góðum stað og hafa fótboltayfirvöld í Frakklandi ákveðið að félagið falli niður í þriðju efstu deild vegna brota á fjármálareglum.
Bordeaux átti skelfilegt tímabil þar sem liðið fékk á sig 91 mark í 34 deildarleikjum. Það má með sanni segja að staðan sé ekki góð hjá félaginu.
Bordeaux má áfrýja ákvörðuninni og mun líklegast gera það.
Athugasemdir