banner
   þri 17. janúar 2023 12:04
Sæbjörn Þór Þórbergsson Steinke
Tryggvi Hrafn ristarbrotinn og verður frá næstu mánuði
Mynd: Fótbolti.net - Hafliði Breiðfjörð
Tryggvi Hrafn Haraldsson, leikmaður Vals, er ristarbrotinn og verður frá í allavega tvo mánuði. Þetta staðfesti Skagamaðurinn í samtali við Fótbolta.net í gær.

„Þetta er álagsbrot í ristinni. Þetta þarf að gróa, næstu tvær vikur má lítið álag á fótinn og svo vinnum við okkur upp eftir það. Það er langtímamarkmið hjá mér að vera klár í fyrsta leik í mótinu, allavega vera farinn að æfa þá," sagði Tryggvi.

Fyrsti leikur Vals í Bestu deildinni er gegn ÍBV á heimavelli þann 10. apríl.

Þetta er í annað sinn á stuttum tíma sem Tryggvi er frá vegna meiðsla á rist. Hann lék ekkert í um einn og hálfan mánuð í lok síðasta tímabils vegna svipaðra meiðsla.

Tryggvi lék allan leikinn gegn Fjölni í Reykjavíkurmótinu en fór í kjölfarið í myndatöku þar sem kom í ljós að hann væri brotinn. Hann er nú í gönguspelku og verður í slíkri áfram næstu daga.
Athugasemdir
banner
banner
banner