Hafnfirðingurinn stóð sig með eindæmum vel í síðasta leik sem var fyrsti byrjunarliðsleikur hans í langan tíma.

Hann fékk mikið lof fyrir frammistöðuna á staðarmiðlunum í Lecce og voru stuðningsmenn ánægðir með að fá 'nýjan' leikmann inn í þessum glugga.

Þórir spilaði á miðsvæðinu í dag en átti einnig virkan þátt í sóknarleiknum. Lecce tók forystuna á 42. mínútu í gegnum Santiago Pierotti sem skaut boltanum við vítateigslínuna og í vinstra hornið.

Gianluca Gaetano jafnaði á 60. mínútu og aðeins þremur mínútum síðar var Þóri skipt af velli. Í kjölfarið skoruðu heimamenn í Cagliari annað markið áður en Ante Rebic, leikmaður Lecce, var rekinn af velli,

Cagliari bætti við tveimur mörkum á þremur mínútum áður en flautað var til leiksloka og lokatölur 4-1. Cagliari er í 13. sæti með 21 stig en Lecce í 16. sæti með 20 stig.

Bjarki Steinn Bjarkason og Mikael Egill Ellertsson voru báðir í byrjunarliði Venezia sem gerði 1-1 jafntefli við Parma í nýliðaslag.

Venezia tók forystuna á 20. mínútu. Joel Pohjanpalo skoraði úr vítaspyrnu sem John Yeboah fiskaði en heimamenn í Parma jöfnuðu snemma í þeim síðari er Antonio Candela braut á Drissa Camara í teignum.

Hernani fór á punktinn fyrir Parma og skoraði. Venezia kom boltanum í netið síðar í leiknum en markið dæmt af vegna rangstöðu.

Eftir það var það Parma sem setti pressuna á Venezia, en Filip Stankovic, markvörður gestanna, átti enn einn stórleikinn og sá til þess að liðið tæki að minnsta kosti stig með sér í farteskinu.

Venezia er í næst neðsta sæti með 15 stig en Parma í 15. sæti með 20 stig.

Cagliari 4 - 1 Lecce
0-1 Santiago Pierotti ('42 )
1-1 Gianluca Gaetano ('60 )
2-1 Sebastiano Luperto ('65 )
3-1 Nadir Zortea ('80 )
4-1 Adam Obert ('83 )
Rautt spjald: Ante Rebic, Lecce ('73)

Parma 1 - 1 Venezia
0-1 Joel Pohjanpalo ('20 , víti)
1-1 Hernani ('56 , víti)