Spænski blaðamaðurinn Gerard Romero greindi frá því í gær að Aguero ætlaði sér að leggja skóna á hilluna eftir að hann fékk hjartatruflanir í leik með Barcelona á dögunum.

Aguero má ekki spila með Börsungum næstu þrjá mánuði en samkvæmt Romero þá ætlar argentínski framherjinn að kalla þetta gott og leggja skóna á hilluna.

Nasri og Aguero voru góðir félagar hjá Manchester City en hann staðfesti í viðtali við L'Equipe að Aguero væri að hætta.

„Hann sendi mér skilaboð og því miður þá er þetta staðfest. Mér þykir þetta rosalega leitt því fyrir utan það að vera leikmaður sem allir þekkja þá er hann líka frábær gaur," sagði Nasri.

Xavi sagði eftir 1-0 sigurinn á Espanyol í gær að fréttirnar væru ekki sannar.