Víkingur Reykjavík hefur unnið báða leiki sína í Lengjubikarnum en liðið vann 3-1 sigur gegn Selfossi í leik sem var að ljúka í Egilshöllinni.

Víkingar byrjuðu leikinn á látlausri sókn og Atli Fannar Jónsson átti skalla í slána áður en Stefán Pálsson náði að brjóta ísinn eftir sendingu frá Rolf Toft.

Víkingar réðu lögum og lofum, höfðu algjöra yfirburði og Stefán bætti öðru marki sínu og öðru marki Víkings við á 39. mínútu. Að þessu sinni eftir fyrirgjöf Dofra Snorrasonar sem var með fyrirliðabandið í dag.

Haukur Baldvinsson var nálægt því að skora með skalla í upphafi seinni hálfleiks en Vigfús Blær Ingason varði vel í marki Selfyssinga. Á 65. mínútu kom þriðja mark Víkinga þegar Andri Rúnar Bjarnason skoraði en hann snéri boltanum laglega í hornið.

Daninn Thomas Nielsen stóð í marki Víkinga en það reyndi afar lítið á hann. Hann gerði þó mistök þegar Grótta minnkaði muninn á 85. mínútu, fór í skógarhlaup og var refsað. Nielsen gekk í raðir liðsins í vetur og mun verja mark liðsins á komandi tímabili.

Fleiri urðu mörkin ekki en Einar Ottó Antonsson í liði Selfyssinga fékk að líta rauða spjaldið í lokin fyrir glórulausa tæklingu. Góður dómari leiksins, Sigurður Óli Þórleifsson, lyfti upp rauða spjaldinu.

Selfoss er með eitt stig eftir tvo leiki.

Byrjunarlið Víkings: Thomas Nielsen (m), Ívar Örn Jónsson, Rolf Toft, Dofri Snorrason (f), Atli Fannar Jónsson, Haukur Baldvinsson, Stefán Þór Pálsson, Alan Lowing, Ásgeir Frank Ásgeirsson, Davíð Örn Atlason, Andri Rúnar Bjarnason.

Byrjunarlið Selfoss: Vigfús Blær Ingason (m), Jordan Edridge, Sigurður Eyberg Guðlaugsson, Einar Ottó Antonsson, Ingi Rafn Ingibergsson, Þorsteinn Daníel Þorsteinsson (f), Magnús Ingi Einarsson, Haukur Ingi Gunnarsson, Luka Jagacic, Ingþór Björgvinsson, Arnar Logi Sveinsson.