Mynd: EPA

Belgarnir byrjuðu leikinn vægast sagt af krafti en eftir tveggja mínútna leik voru þeir búnir að taka forystuna með glæsilegu marki frá Youri Tielemans. Romelu Lukaku kom boltanum út í teig á Tielemans sem tók skotið í fyrsta og boltinn söng í netinu.

Belgar voru heilt yfir betri aðilinn í fyrri hálfleik og 1-0 forysta Belga fyllilega sanngjörn í hálfleik.

Rúmenar komu af krafti út í seinni hálfleikinn en hægt og rólega tóku Belgar aftur yfir leikinn og fengu urmul af færum í seinni hálfleik. Eitt af þeim færum var þegar De Bruyne senti Lukaku einan í gegn. Lukaku gerði allt rétt og skoraði en eina sem hann gerði ekki rétt var að vera fyrir innan. Það munaði alls ekki miklu en þetta er þriðja markið hans á mótinu í tveimur leikjum sem hafa verið dæmd af honum. 

Maður sá það að það var enginn annar inn á vellinum sem vildi meira skora en Lukaku og hann reyndi allt sem hann gat. Það var hins vegar títtnefndi Kevin De Bruyne sem kom Belgum yfir í 2-0 eftir sendingu frá Koen Casteels, markmanni Belgíu.

Bæði lið fengu færi til að skora í lok leiks en bæði Casteels, í marki Belga, og Nita, í marki Rúmena, gerðu vel að verja.