Heimild: mbl.is
Ragnar Sigurðsson er á meðal landsleikjahæstu leikmanna Íslands frá upphafi.
Landsliðsmaðurinn Ragnar Sigurðsson hefur áhyggjur af framtíð landsliðsins en honum finnst vanta fleiri unga leikmenn sem séu að banka almennilega á dyrnar.
Þetta kemur fram í Dagmálum, vefsjónvarpsþætti Morgunblaðsins.
Þetta kemur fram í Dagmálum, vefsjónvarpsþætti Morgunblaðsins.
„Mér finnst við ekki eiga nægilega marga góða unga leikmenn eins og staðan er í dag. Það er til fullt af efnilegum strákum en þetta er ekki nálægt því að vera eins og þegar Jói og Gylfi og fleiri komu inn í hópinn á einu bretti," segir Ragnar í þættinum.
„Það fer að koma tími á þetta lið sem við eigum og vonandi fer maður að heyra fleiri nöfn nefnd til sögunnar í kringum landsliðið. Það eru margir strákar að standa sig ágætlega erlendis en alls ekki nógu margir."
Ragnar er 35 ára gamall en hann hélt heim úr atvinnumennskunni í sumar og gekk í raðir uppeldisfélags síns Fylkis. Hann vonast til að vera í landsliðshópnum sem tilkynntur verður í vikunni.
Ísland mætir Rúmeníu, Norður-Makedóníu og Þýskalandi á Laugardalsvelli í undankeppni HM í komandi mánuði. Leikirnir verða 2., 5. og 8. september. Ísland er með þrjú stig í riðli sínum.
Athugasemdir
