Ragnar hefur farið á kostum á EM og hann var spurður að því hvort að hann sé að spila sinn besta fótbolta á ferlinum að sínu mati. „Getur maður ekki sagt það? Þetta er rosalega stórt svið hérna. Það spilar inn í hvað manni finnst um eigin frammistöðu."

Ragnar og Kári Árnason hafa verið frábærir í hjarta varnarinnar á mótinu. Ragnar talaði um samvinnu þeirra. „Hún er frábær eins og hún hefur verið síðustu 4-5 árin. Hún verður bara betri og betri."

Væri snilld að fara í félagslið með Kára
Ragnar er líklega á förum frá Krasnodar eftir EM en gætu hann og Kári farið í sama lið? „Þetta virkar ekki þannig. Það væri snilld að við gætum farið eitthvað saman en það er sjaldan sem það gerist í fótboltanum."

Ragnar segir að leikmenn íslenska liðsins hafi náð að halda sér niðri á jörðinni eftir sigurinn magnaða á Englandi. „Við erum búnir að vera í þessum winning pakka í 4-5 ár og við vitum alveg hvað við erum að gera," sagði Ragnar.

„Auðvitað erum við í skýjunum með þennan árangur en við reynum okkar besta til að halda okkur á jörðinni og mér finnst við vera búnir að gera það."

Svipað gegn Frökkum og Englandi
Næsti leikur Íslands er gegn Frökkum í 8-liða úrslitunum í París á sunnudagskvöldið.„Ég hugsa að þetta verði svipaður leikur á móti Englendingunum. Við verðum underdogs og þurfum að sanna mikið. Ég tel að þetta sé mjög svipuð fótboltalið," sagði Raggi.

Hér að ofan má sjá viðtalið í heild sinni.